Hoxhaj kërkon nga Gjermania vazhdimin e përkrahjes së fuqishme për proceset integruese të Kosovës

Shkarko me rezolucion më të madhShkarko me rezolucion më të madh

Pas takimit, ministri Hoxhaj ka thënë se Erler është një mik dhe mbështetës shumë i madh i Ballkanit dhe i Kosovës, i cili në vazhdimësi e ka mbështetur paqen, stabilitetin dhe sigurinë në rajon dhe në Kosovë.

Ministri Hoxhaj ka bërë të ditur se e ka informuar z. Erler për zhvillimet në Kosovë, duke filluar që nga puna që po bëhet për përmbylljen e pavarësisë së mbikëqyrur, konsolidimin e shtetësisë, situatën në veri të vendit, për dialogun teknik ndërmjet Kosovës dhe Serbisë si dhe për agjendën evropiane.

“E falënderova për mbështetjen e fuqishme që Gjermania i ka dhënë Kosovës para pavarësisë dhe pas pavarësisë, pra për një mbështetje të madhe që ka ndodhur me dekada të tëra dhe i kërkova mbështetje sidomos për procesin e liberalizmit të vizave dhe në rrugën e mëtejshme integruese të Kosovës”, deklaroi Ministri Hoxhaj.

Në anën tjetër, nënkryetar i Grupit Parlamentar të SPD-së në Bundestagun gjerman, Gernot Erler, tha se Gjermania do të mbështesë Kosovën jo vetëm në procesin e liberalizimit të vizave por edhe në shumë aspekte të tjera.

Erler ka thënë se Gjermania është shumë e përkushtuar për të përkrahur Republikën e Kosovës duke theksuar se Gjermania është një partner i madh i Kosovës.

Ai deklaroi po ashtu se e ka kuptuar shumë mirë se çfarë roli luan procesi i liberalizmit të vizave për qytetarët e Kosovës dhe atmosferën këtu.

“Ne e kuptojmë plotësisht frustrimin që në Kosovë ende nuk ka ardhur udhërrëfyesi. Ky proces është vonuar, është koha e fundit që të kemi hapa konkret dhe ne besojmë që brenda një kohe të shkurtër do të ndodhë ky proces”, tha Erler.