Kosova dhe Tajlanda do të forcojnë bashkëpunimin në të gjitha fushat

Shkarko me rezolucion më të madhShkarko me rezolucion më të madh

Një takim të veçantë, ministri Hoxhaj e ka zhvilluar me zëvendësministrin e Punëve të Jashtme të Mbretërisë së Tajlandës, Jullapong Nonsrichai.

Ministri Hoxhaj ka theksuar rëndësinë e njohjes së pavarësisë së Kosovës nga Mbretëria e Tajlandës dhe nga shtetet tjera të Azisë.

“Procesi i njohjes së Republikës së Kosovës është i pakthyeshëm. Me njohjen e Kosovës, Mbretëria e Tajlandës dhe shtetet tjera të Azisë do të kontribuojnë në paqen, stabilitetin dhe sigurinë në Ballkan dhe Evropë”, ka shtuar ai.

Nga ana tjetër zëvendësministri Nonsrichai ka siguruar ministrin Hoxhaj se shumë shpejt të dy vendet do të lidhin marrëdhënie diplomatike.

Në këtë takim është diskutuar edhe për fushat e bashkëpunimit ndërmjet dy ministrive dhe Qeverive në të ardhmen.

Një takim tjetër, ministri Hoxhaj ka zhvilluar edhe me përfaqësues të shoqërisë civile, përfaqësues të Medieve, ambasadorë dhe shumë personalitete të jetës politike dhe publike të Tajlandës.

Ministri Hoxhaj ka informuar ata për zhvillimet në Kosovë, për shtetndërtimin dhe për përpjekjet e Kosovës për të përmbyllur procesin e njohjes së pavarësisë.

Para tyre, ministri Hoxhaj ka folur edhe për mundësitë e shumta që ofron Republika e Kosovës për investime të huaja.

“Republika e Kosovës ka politika fiskale shumë të favorshme për investime të huaja, kemi një infrastrukturë ligjore që është moderne, kemi popullatën me të re në Evropë, që shërben si fuqi e kualifikuar punëtore”, ka theksuar Hoxhaj, duke u bërë thirrje investitorëve tajlandezë të investojnë në Republikën e Kosovës.

Nga ana tjetër, ata kanë siguruar ministrin Hoxhaj se do të nxisin bashkëpunimin bilateral ndërmjet Republikës së Kosovës dhe Mbretërisë së Tajlandës, bashkëpunimin ekonomik, arsimor dhe kulturor. Hoxhaj në fund ka ftuar ata që të vizitojnë Republikën e Kosovës.

Një ditë më parë, gjatë takimit me ministrin e Punëve të Jashtëm të Mbretërisë së Tajlandës, Surapong Tovichakchaikul, ministri Hoxhaj ia ka dorëzuar kërkesën zyrtare për njohjen e pavarësisë së Kosovës nga ana e Mbretërisë së Tajlandës.