Sekretari i Përgjithshëm i MPJ-së, Nagip Skenderi ka zhvilluar një vizitë zyrtare në Republikën e Bullgarisë

Sekretari i Përgjithshëm i MPJ-së, z.Nagip Skenderi gjatë takimit me Sekretarin e Përhershëm në MPJ-në bullgare, z. Ivan Stoyanov SirakovShkarko me rezolucion më të madh

Gjatë takimeve u vlerësua lart përkrahja e deritashme e institucioneve bullgare karshi Republikës së Kosovës, që nga shpallja e pavarësisë së saj, ku Republika e Bullgarisë ishte ndër vendet e para që e njohu Kosovën si shtet të pavarur dhe sovran, mbrojtjes së pozicionit pro pavarësisë në Gjykatën Ndërkombëtare të Drejtësisë në Hagë, si dhe përkrahjes së vazhdueshme në nismat rajonale. Sekretari i Përgjithshëm, z. Nagip Skenderi në takim me homologun e tij ngriti çështjen e përshpejtimit të finalizimit të marrëveshjeve bilaterale të cilat janë në proces e sipër, e që do të ndihmonin ndjeshëm në intensifikimin e raporteve reciproke. Po ashtu u bisedua edhe për nevojën e shkëmbimit të përvojave konkrete në mes të dy ministrive mbi bazën e protokollit të bashkëpunimit të nënshkruar vitin e kaluar, si dhe njoftoi homologun bullgar për zhvillimet e fundit  aktuale në Kosovë. Në takim u theksua nevoja që shteti bullgar të vazhdoj me qasjen e saj pragmatike dhe përkrahjen e Republikës së Kosovës në nisma rajonale për çka edhe u sigurua zotimi nga ana e z. Sirakov.

Në takim me z. Aleksandar Bakalov, Drejtor i Departamentit për Shtete Fqinje në MPJ-në bullgare u shtjelluan marrëveshjet bilaterale në proces si dhe u diskutua gjerësisht mbi sfidat me të cilat ballafaqohet MPJ e Republikës së Kosovës në fushat e administrimit të  gjithëmbarshëm, zbatimin e politikave të caktuara dhe aktiviteteve të planifikuara, konsolidimin të mëtutjeshëm të përfaqësive diplomatike të Republikës së Kosovës dhe menaxhimin efektiv dhe efikas të burimeve dhe kapaciteteve ekzistuese. Në takim u bisedua po ashtu edhe për zhvillimet aktuale politike pas raundit të fundit të dialogut teknik Prishtinë-Beograd dhe u kërkua nga institucionet bullgare që në nismat rajonale të shfrytëzohet ndikimi i Republikës së Bullgarisë që të mos lejohet kushtëzimi i pjesëmarrjes së Kosovës jashtë kornizave të marrëveshjeve të arritura në Bruksel.  Z. Bakalov rikonfirmoi mbështetjen e vazhdueshme për Kosovën nga ana e Bullgarisë duke shtuar se MPJ bullgare po punon në mënyrë intensive në finalizimin e marrëveshjeve bilaterale si dhe në organizimin e vizitës së Kryeministrit Hashim Thaçi në Republikën e Bullgarisë.

Sekretar i Përgjithshëm, z. Nagip Skenderi , i shoqëruar nga z. Sylë Ukshini, Drejtor për çështje rajonale në MPJ dhe Ambasada e Republikës së Kosovës në Sofje, zhvilloi takim pune edhe me Drejtoren e Institutit Diplomatik në Sofje, znj. Tanua Mihaylova. Gjatë takimit në institut u vlerësua lartë përkrahja e deritashme e këtij institucioni në këshillat dhe trajnimet e ofruara për stafin diplomatik kosovar dhe shërbyesit civil në Kosovë. Zyrtarët e lartë nga Kosova njoftuan për aktivitetet aktuale në MPJ në fushën e trajnimit dhe ngritjes së kapaciteteve, planet për zgjerim të misioneve diplomatike me qëllim të aktiviteteve lobuese dhe arritjes së synimit parësor, ngritjen e numrit të njohjeve të vendit në sferën ndërkombëtare dhe për synimin e vazhdimit të bashkëpunimit të shkëlqyeshëm me Institutin. Në takim u shpalos vendimi i Qeverisë së Kosovës për themelimin e Akademisë Diplomatike të Republikës së Kosovës, me qëllim të ngritjes së kapaciteteve të stafit diplomatik-konsullor dhe përgatitjes së shërbyesve civil në fusha të ndryshme, ndërsa iu bë ftesë Institutit për vizitë punë në Prishtinë me qëllim të shkëmbimit të përvojës dhe njohurive në themelimin e Akademisë. Instituti Diplomatik në Sofje konfirmoi se do të vazhdojë me projekte të përbashkëta për të mbështetur edhe më tutje Ministrinë e Jashtme të Kosovës, ndërsa me kënaqësi u pranua ftesa për vizitë pune në Kosovë në fillim të muajit korrik 2012.