Na ndiqni në:

Të premten në Prishtinë nis “AppCamp Kosova”

Prishtinë, 1 nëntor 2012 - Ministria e Punëve të Jashtme e Republikës së Kosovës, në bashkëpunim me partnerët, Ambasadën e Britanisë së Madhe, Ambasadën Mbretërore të Norvegjisë dhe Innovation Center Kosovo, kanë organizuar garën nacionale për krijimin e aplikacioneve mobile, projekt i implementuar nga IPKO Foundation.

“AppCamp Kosova” është aktivitet në kuadër të Strategjisë për Diplomaci Digjitale të Kosovës, dhe ka për qëllim të sjellë së bashku ideatorët, zhvilluesit e aplikacioneve, projektuesit dhe sipërmarrësit në mënyrë që të konkurrojnë për ndërtimin e aplikacionit më të mirë kosovar (iOS dhe Android), në katër kategori: Lajme dhe Informacione, Kulturë, Trashëgimi dhe Traditë, Turizëm dhe Ekonomi, Lojëra zbavitëse (“Games”)

Në këtë garë, të parën të këtij lloji në rajon, kanë konkurruar mbi 280 persona, të cilët do të garojnë për katër aplikacionet fituese.

Katër personave apo ekipeve të cilët do të fitojnë në këtë garë te dielen, do t’iu ndahet një shumë prej 3000 eurosh.

Po ashtu, dy personave nga ekipi fitues të përzgjedhur do t’iu mundësohet përfaqësimi i Kosovës në “Mobile World Congress 2012”, në Barcelonë.

Aktivitetet qendrore të “AppCamp Kosovës” do të zhvillohen nga data 2 deri më 4 nëntor 2012, në Innovation Center Kosovo, Rexhep Mala 28A, http://goo.gl/maps/0irR9.

Deri më tani pjesëmarrjen e tyre në këto aktivitete e kanë konfirmuar mbi 15 ekipe me disa dhjetëra aplikacione.

Gjatë ngjarjes, pjesëmarrësit do të takohen me mentorët, ekspertët e aplikacioneve që vijnë nga kompanitë e larta mobile, si dhe atyre që na mbështesin në tregun global, zgjerimin e aplikacioneve të reja që vijnë nga Kosova për në ekosistemin e gjerë ndërkombëtar të aplikacioneve mobile.

Në "AppCamp Kosova", do të marrin pjesë edhe përfaqësues nga Ministria e Punëve të Jashtme dhe të Ambasadave.

Për më shumë informacione mund të drejtoheni në web faqen: http://appcampkosovo.com/